Psalms 13 · Biblica® Open Asante Twi Contemporary Bible 2020
1Ao, Awurade, ɛnkɔsi da bɛn? Wo werɛ bɛfiri me afebɔɔ anaa?
Ɛnkɔsi da bɛn na wode wʼanim bɛhinta me? 2Ɛnkɔsi da bɛn na mene mʼadwendwene bɛdi apereapereɛ
na awerɛhoɔ ahyɛ mʼakoma mu daa?
Mʼatamfoɔ nni me so nkonim nkɔsi da bɛn? 3Te wʼani hwɛ me na bua me, Ao, Awurade, me Onyankopɔn.
Ma mʼani so nyɛ hann, na manna owuo nna. 4Me ɔtamfoɔ bɛka sɛ, “Madi ne so nkonim.”
Na mʼahohiahiafoɔ bɛdi ahurisie ɛberɛ a mahwe ase. 5Nanso mede me ho to wo dɔ a ɛnsa da no so;
mʼakoma di ahurisie wɔ wo nkwagyeɛ mu. 6Mɛto dwom ama Awurade,
ɛfiri sɛ ɔne me adi no yie.
Wɔde ma dwomkyerɛfoɔ no.
Asante Twi text and audio: Biblica® Open Asante Twi Contemporary Bible™, made available under an open license by Biblica, Inc.